Peretītenira’a

Ua tae mai te Fa’aterehaunui vahine no te mau Ara-Moana, o Annick Girardin, i te po’ipo’i tapati ra, i te taura’a manureva no Tahiti-Fa’a’a, no te hō’ē tere mana, piri i te hō’ē hepetoma te maorora’a i Porinetia farani nei.

 

I tō’na taera’a mai i te tahua taura’a manureva,  ua fariihia’tu te Fa’aterehaunui vahine e te Peretiteni no Porinetia farani, o Edouard Fritch.

 

Ua haere atu ‘ōia, i muri iho, i te monūma o te feia pohepohe i Papeete, no te hō’ē tu’ura’a pupa tiare.

 

Ua tere atu te Fa’aterehaunui vahine e farerei i te huira’atira, na roto i tō’na haerera’a’tu i muri iho, i te matete no Papeete.

 

E tupu te hō’ē tau’aparaura’a mana i muri iho i te Peretitenira’a e te Peretiteni no Porinetia farani, o Edouard Fritch.

 

I roto i tō’na tere mana, e tere ato’a atu te Fa’aterehaunui vahine i roto e piti ta’amotu. ’Ōia mau, i te monire e i te mahana piti, e tere atu ’Ōia i roto i te Ta’amotu no Matuita, i ni’ a i te mau motu no Hiva ’Oa e no Nuku Hiva.

 

I muri a’e hō’ē mahana i Tahiti, i te mahana toru, e tere ato’a atu ’Ōia i roto i te Ta’amotu no Tuamotu mā, i ni’a i te motu no ’Arutua.

E hope tō’na tere mana i Porinetia farani nei i te po’ipo’i mahana pae.