FĀRI’IRA’A

TE MAU TAPURA ‘OHIPA A TE ‘APO’ORA’AHAU NO PORINETIA FARANI

Ua tae mai te Fa’aterehaunui vahine no te mau Fenua Aramoana, o George Pau-Langevin, i te monire po’ipo’i iho nei, i Porinetia nei. Ua fariihia’tu ‘ōia i te Tahua taura’a manureva no Tahiti-Faaa, e te Peretiteni no Porinetia farani, o Edouard Fritch e te ta’ato’ara’a no tā’nā ‘Āpo’ora’ahau.

Ua ‘āmui te Peretiteni no Porinetia farani, o Edouard Fritch, te Tōmitera Teitei, o Lionel Beffre, e Tavana ‘Ōire no te ‘Ōire no Faaa, o Oscar Temaru, i te tahara’a mahana no te mahana pae ra, i te Farehau no te ‘Ōire no Faaa, no te tarima i te fa’aāura’a ti’atoru no te horo’a fa’ahoura’a i te nohora’a no te mau huira’atira’a no te hiti tahua taura’a manureva rahi no Tahiti-Faaa, no taua tūha’a ra o tei pii-noa-hia o « Hotuarea ».

I te po’ipo’i mahana pae ra, ua farii atu te Peretiteni Edouard Fritch, na roto i te fa’anahora’a no te farereira’a aufa’atura, ia Grégoire De Chillaz, Peretiteni Fa ‘atererahi ‘āpi no te taiete uira EDT, o tei ‘āpe’ehia mai e Hervé Dubost Martin, tei na mua atu na ia’nā i ni’a i taua ti’ara’a ra, e o Yvonnick Raffin, Fa’atererahi mono.

I te ropura’a no te mahana toru iho nei, ua farii atu te Peretiteni Edouard Fritch, ma te ‘āmuihia’tu e tā’nā mau Fa’aterehau, ia Guy Laliberté, o tei ‘āpe’ehia mai e Olivier Noinain, no te hō’ē farereira’a autaea’e.

Ua ‘iriti hanahanahia te Putuputura’a ta’a-è a te ‘Āpo’ora’arahi no Porinetia farani, i te po’ipo’i mahana piti iho nei. No te reira, ua horo’a atu te Peretiteni Edouard Fritch i te hō’ē ‘ōrerora’a parau i roto i te reira to’na fa’ahitira’a atu i te parau no te mau tapura ‘ōhipa rarahi roa o te tuatapapahia’tu  roto i taua putuputura’a ta’a-è ra.

Ua reva atu te Peretiteni Edouard Fritch, i te tapati e te monire ra, i Tuamotu ma, i Tikehau e i Rairoa, na piha’iiho i te Peretiteni no te Tōmite o te mau Ture a te ‘Āpo’ora’a ‘iriti Ture, o Jean-Jacques Urvoas. Ua ‘āmui ato’a atu na Tepute e piti, o Maina Sage e o Jean-Paul Tuaiva, e tae noa’tu i te Peretiteni no te SPCF (Āupupu no te Fa’ahotu i te mau ‘Ōire no Porinetia farani), o Cyril Tetuanui, e ua farii poupouhia mai teie Tōmite tere e te huira’atira no Tikehau.

article thumbnailUa tupu te ‘Āpo’ora’a a te mau fa’aterehau, i te mahana toru ra, i te Peretitenira’a no Porinetia farani.   
A hi o i te tahi e atu mau āpo’ora’a a te mau fa’aterehau